Pages

Dec 24, 2013

விண்மகன் வந்துதித்தான்!..

வலையுலக அனைத்து உறவுகளுக்கும்
என் இதயங் கனிந்த நத்தார் திருநாள்
நல் வாழ்த்துக்கள்!
~~~000~~~

விண்மகன் வந்துதித்தான்!


அன்பெனும் அருளினில் அகிலமே நனைந்திட
அருந்தவன் வந்துதித்தான்! - எங்கள்
ஆதவன் வந்துதித்தான்!
துன்பங்கள் தொலைந்திடத் துயரங்கள் அகன்றிடத்
தூயனாய் வந்துதித்தான்! - நல்ல
தூதனாய் வந்துதித்தான்! 

பொய்மையைப் போக்கவும் உண்மையைக் காக்கவும்
புனிதனாய் வந்துதித்தான் !- உலகில்
புதுமையாய் வந்துதித்தான்!
நல்லதை நாட்டவும் நன்மையைக் கூட்டவும் 
நமக்கென வந்துதித்தான்! - யேசு
நாட்டினைக் காக்க வந்தான்!

வேதனை தீர்க்கவும் சாதனை சேர்க்கவும் 
வேதமாய் வந்துதித்தான்! - வானில்
விண்மீனாய் வந்துதித்தான்!
விந்தைகள் விளைந்திட விடுதலை நாம்பெற
விரைவாக வந்துதித்தான்! - அந்த
விண்மகன் வந்துதித்தான்!

விரும்பிய வாழ்வினை விளைத்திட வேண்டிய
ஆண்டவன் வந்துதித்தான்! - ஒளி
பூண்டவன் வந்துதித்தான்! -
அரும்பிய ஆசையால் அவன்புகழ் பாடியே
நலமெலாம் ஏற்றிடுவோம் - யேசு
மலரடி போற்றிடுவோம்!
~~~000~~~


அனைவருக்கும் இனிய புத்தாண்டு நல் வாழ்த்துக்கள்!
~~~
எண்ணங்கள் அனைத்தும் இனிதாக வேண்டும் - எங்கும்
வண்ணங்கள் மலர்ந்து வளமாக வேண்டும்!
இன்பங்கள் சிறந்து எழில்பாட வேண்டும்  - எங்கள்
இனியதமிழ் உலகை அரசாள வேண்டும்!

~~~000~~~

பாருடன் கூடியே பைந்தமிழைக் காப்பேனே!
சீருடன் நற்பணிகள் செய்து!

~~~000~~~

பதிவோடு பகிரும் பதிவர்




வலையுலகில் எனது அன்புக்குரியவர்களில் இன்னுமொரு தோழியான
தமிழ்முகில் பிரகாசம் அவர்களின் முகிலின் பக்கங்கள்
என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்து கொள்வதில் 
மிக்க மகிழ்வடைகிறேன்.
முகிலின் பக்கங்கள்

http://tamizhmuhil.blogspot.com/

தோழி தமிழ்முகில் பிரகாசம் தனது இந்த வலைப்பூவில் மிகுந்த ஆர்வமுடன் இனிய நல்ல கவிதைகளை எழுதிப் பதிவு செய்து எம்முடன் பகிர்ந்து வருகின்றார்.

தோழி அவர்கள் இவ் வலைப்பூவினைத் தவிர இன்னும் இரண்டு வலைப்பூக்களையும் படைத்துப் பதிந்து வருகிறார்.
 muhilneel
இவ் வலைத்தளத்தில் கதம்பமாக பல விடயங்களைப் பதிவிட்டும்…

My Clicks  
இவ் வலைத்தளத்தில் தான் எடுக்கும் நிழற் படங்களைப் பதிந்தும் வருகிறார்.

இவர் தனது இவ் வலைத்தளத்தைவிட வேறு பல தளங்களிலும் தனது பங்களிப்பாகத் பல படைப்புக்களைப் பதித்துவருகிறார்.
தனது பதிவுகளோடு சக பதிவர்கள் வலைத் தளங்களுக்கும் சென்று சிறந்த நல்ல கருத்துகளைப் பகிர்வு செய்து அவர்களையும் ஊக்குவிக்கும் அன்பானவர்.

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களும் தோழியின் வலைப்பூவிற்குச் சென்று பார்த்து மேலும் அறிந்து கொள்ளலாம்.

தோழி தமிழ்முகில் பிரகாசம் அவர்களின் வலைப்பூவினைத் தெரியாதோர் அவர் தளத்திற்கும் சென்று படித்துக் கருத்துப் பகிர்வு செய்து அவரையும் ஊக்குவிக்கலாமெனும் நோக்கோடு இங்கு  இத்தரவுகளை உங்களோடு பகிர்ந்து கொள்வதில் மிக்க மகிழ்வடைகின்றேன்!.
மிக்க நன்றி அன்பு உறவுகளே!

_()_

Dec 17, 2013

அழகென்றால்...

ஒன்றரை வருடத்திற்கு முன்னர் செய்த எனது இரண்டாவது 
க்விலிங் கைவேலை இதுவாகும்.

ஆரம்ப காலத்தில் என்னிடம் இதற்குரிய டூல் - கருவிகள் ஏதும் இருக்கவில்லை. சிறிய பல்லுக் குத்தும் குச்சியில் கருவிபோல முனையில் வெட்டி அதனில் வெட்டிய தாள் நாடவை வைத்துச் செய்தேன்.

சரியாகச் செய்யப்படவில்லை என்றாலும் என்னை அதன் வடிவம் ஓரளவு திருப்திப்படுத்தியதால் உங்கள் பார்வைக்கும் தந்துள்ளேன்...

உங்கள் கருத்துகள் என்னை ஊக்குவிக்கும்! மிக்க நன்றி!..:)
~~~~~~

அழகென்றால்...
 
ஆடும் மயிலின் வனப்பெல்லாம்
அசத்தும் வண்ணத் தோகையிலே!
பாடும் குயிலின் கோலமதைப்
படைத்தான் அதனின் குரலினிலே!
ஏடும் காணும் எழில்மிகவே
ஏற்றும் பதிவுச் சுவைதனிலே!
கூடும் மாந்தர் அழகென்றால்
கொழிக்கும் உயர்ந்த குணம்தானே!
~~~~000~~~~

வளம்பெறச் செய்வீர்!...


வேடிக்கை கூத்தென வீணே புரிவதை 
வாடிக்கை தானாக்கி வாழாதீர்! - வாடி
நலமின்றிச் சோரும்! நமதுறவின் மேன்மை  
வளமின்றிப் போகும் வரண்டு!

வளம்பெறச் செய்வீர் வளரும் உலகை!
உளமுறச் செய்வீர் உழைப்பை! -  களம்பல
கண்ட தமிழ்மொழியைக் காப்பீர்! இழுக்கின்ற 
நண்டெனும் போக்கை நசித்து!
~~~~000~~~~


எண்ணமெலாம் நீயே எனக்குள் நிறைவாக
வண்ணமெலாம் காட்டு மலர்ந்து!
~~~~~~~~

பதிவோடு பகிரும் பதிவர்


வலையுலகில் சமீப காலமாக எனக்கு அறிமுகமான அன்புக்குரிய சகோதரர்களில் ஒருவராகிய
மது அவர்களின் மலர்த்தரு
 என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்து கொள்வதில்
மிக்க மகிழ்வடைகிறேன்.

சகோதரர் மது தனது வலைப்பூவிலேயே தன்னைப்பற்றி...
மது?
நான் வாசிப்பு மாற்றங்களை தரும் என்று நம்புகிற, பாடத்திற்கு வெளியிலும் வாசிக்கும் மாணவர்களை உருவாக்கும் ஒரு ஆசிரியன்.

ஜே.சி.ஐயின் மண்டலப் பயிற்சியாளர்களில் ஒருவன்.இராமநாதபுரத்தில் துவங்கி மன்னார்குடிவரை பல்வேறு நிலை மாணவர்களை சந்திக்கிற வாய்ப்பை எனக்கு தந்த இளைஞர் பேரியக்கம் ஜே.சி.ஐ.

அரசுப் பள்ளி மாணவர்களுக்கு வாழ்வியல் திறன்களை  இலவசமாக வழங்கிவரும் நிகில் நிறுவனத்தின் பயிற்சியாளர்களில் ஒருவன்....

என்று இவ்வாறு கூறியுள்ளார்.
 மது அவர்களின் வலைப்பூ அருமையான விடயங்கள் பலவற்றை உள்ளடக்கிய நல்லதொரு கதம்ப வலைத்தளம் ஆகும்.


வாசிப்புக்குப் போதிய நிறைய விடயங்கள் அங்கு இருப்பதைக் காண்கிறேன்.

உதாரணத்திற்கு... ஒரிரு தினங்களுக்கு முன்னர் அவர் தளத்தில் நான் மேய்ந்து கொண்டிருந்தபோது `நலம்’ என்னும் லேபிள் பதிவுகளில்
 ”மூக்குத்தி அணிவது ஏன்” என்ற பதிவில் மூக்கில் வலப்பக்கம், இடப்பக்கம் மூக்கு குத்துவது பற்றி இருந்த விடயம் - என்னவர் முன்பு என்னுடன் கூறிய பல சம்பவங்களை நினைவில் நிழலாட வைத்தன... அப்போதெல்லாம் அவருடன் நான் நீங்கள் கற்பனையில் கூறுகிறீர்கள் என்றெல்லாம் வாதிட்டிருக்கின்றேன். ஆனால் அதற்கெல்லாம் விஞ்ஞான ரீதியாகக் காரணங்களை மிகத் தெளிவாக மது அவர்கள் பதிவிட்டிருப்பதைப் படித்தேன்.

 இதுபோல் இன்னும் எத்தனையோ சுவாரஸ்யமான பதிவுகள் அவர் வலைத்தளத்தில் என்னை அசர வைத்தன. இவைகளையெல்லாம் நீங்களும் அவர் தளத்திற்குச் சென்று பார்த்துப் படித்து, ரசிப்பதுடன் அவரையும் ஊக்குவித்தால் மிகவும் சிறப்பாக இருக்குமென நான் எண்ணுகிறேன்.

சகோதரர் மது தனது தளத்தில் எழுதுவதுடன் சக பதிவர்கள் வலைப்பூகளுக்கும் சென்று கருத்திட்டு அவர்களையும் ஊக்குவிக்கும் நல்ல மனோ இயல் நிரம்பியவர்.

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களும் அவரின் வலைப்பூவிற்குச் சென்று பார்த்து மேலும் அறிந்து கொள்ளலாம்.
  
இவரின் வலைப்பூவினைத் தெரியாதோர் அவர் தளத்திற்கும் சென்று படித்துக் கருத்துப் பகிர்வு செய்து அவரையும் ஊக்குவிக்க வேண்டுமென அன்புடன் கேட்டுகொள்கின்றேன்.

மிக்க நன்றி அன்பு உறவுகளே!

_()_

Dec 1, 2013

இன்றோர் ஆண்டில்!...

இம்முறை பழங்களை க்விலிங் கைவேலையில்
முதன் முறையாக முயன்றுள்ளேன்...:)
~~~~~~~~

அன்பு உறவுகளுக்கு இனிய வணக்கம்!


கடந்த ஒரு வருடமாக இந்த இளையநிலாவின் வளர்ச்சிக்காக 
உங்கள் அன்பான ஆதரவுடன், இனிய நல்ல கருத்துக்களையும் வழங்கி என்னை ஊக்கப்படுத்திய உங்கள் அனைவருக்கும் 
என் இதயங்கனிந்த இனிய நன்றி!


இன்று மகிழ்வுடன் இரண்டாவது ஆண்டில் காலடியைப் பதிக்கின்றேன்!


வருங்காலத்திலும் இதேபோன்று உங்கள் ஆதரவினை நல்கி இவ் வலைப்பூ மேலும் சிறக்க உதவிடும்படி அன்புடன் கேட்டுகொள்கின்றேன்! மிக்க நன்றி!
0-0-0-0-0

இன்றோர் ஆண்டில்!...


தமிழ் உறவுகளே வணக்கம்! - அருந்
தமிழே நம்முயிர் இயக்கம்!

இன்றோர் ஆண்டில் இளையநிலா - உமக்கு
இனிதாய்த் தந்தேன் என்நன்றி!
என்றும் இதுபோல் உமதன்பு - எனக்கு
இருந்தால் பெறுவேன் மனத்தெம்பு!

நன்றே வலையை அமைத்தனளே - அதிரா
நற்றேன் சுவையைத் தந்தனளே!
இன்றே பலனும் கண்டனனே - அதனை
எண்ணி உவகை கொண்டனனே!

சிந்தை நிறைந்த ஆர்வமென - இருந்த
செம்மைத் தமிழை வளர்க்கின்றேன்!
சந்தக் கவிஞர் பாரதியின் - தாசன்
தயவால் கவிதை இசைக்கின்றேன்!

பொன்போல் மின்னும் கைவினையைக் - கற்றுப்
பொலிய அஞ்சு உதவினளே!
கண்போல் இருக்கும் நட்புகளே! - எந்தக்
கணமும் மறவேன் உம்உறவே!
~~~~~~~~~~


பிறப்பெல்லாம் உன்றனைப் போற்றிக் களிக்கச்
சிறப்பெல்லாம் கூடும் செழித்து!
~~~~~~~~~~~~~~

பதிவோடு பகிரும் பதிவர்

வலையுலகில் எனது அன்புக்குரியவர்களில் இன்னுமொரு தோழியான
இனியா அவர்களின் கவியாகவி - Kaviyakavi
 என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்து கொள்வதில்
மிக்க மகிழ்வடைகிறேன்.
 Kaviyakavi

http://kaviyakavi.blogspot.de/

தோழி இனியா தனது வலைப்பூவினை இந்த வருட ஆரம்பத்தில் தொடங்கித் தொடர்ந்து எழுதிவருகின்றார். தன் வலைப்பூவில் மிகுந்த ஆர்வமுடன் கவிதைகளை எழுதிப் பதிவு செய்து எம்முடன் பகிர்கின்றார்.

அழகான படங்களும் அவற்றுடன் இசைவான கவிதைகளையும் இணைத்து எழுதி எம்மை மகிழ்விக்கும் வலைப்பதிவாளர் தோழி இனியா ஆவார்.

தனது பதிவுகளோடு சக பதிவர்கள் வலைத் தளங்களுக்கும் சென்று சிறந்த நல்ல கருத்துகளைப் பகிர்வு செய்து அவர்களையும் ஊக்குவிக்கும் அன்பானவர்.

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களும் இனியா அவர்களின் வலைப்பூவிற்குச் சென்று பார்த்து மேலும் அறிந்து கொள்ளலாம்.
  
இனியா அவர்களின் வலைப்பூவினைத் தெரியாதோர் அவர் தளத்திற்கும் சென்று படித்துக் கருத்துப் பகிர்வு செய்து அவரையும் ஊக்குவிக்க வேண்டுமென அன்புடன் கேட்டுகொள்கின்றேன்.

அத்துடன் ஆரம்ப நிலையில் இருக்கும் இவரைப் போன்றோரை நாம் ஊக்குவிப்பதனால் அவர்கள் மேலும் மெருகேறி வளரப் பெரும் உதவியாக இருக்கும்.
இனியாவின் வலைத்தள வளர்ச்சிக்கு உதவும் எண்ணத்துடன் இங்கு  இத்தரவுகளை உங்களோடு பகிர்ந்து கொள்வதில் மிக்க மகிழ்வடைகின்றேன்!..

 அன்பு நன்றி உறவுகளே!
_()_

Nov 23, 2013

மண்ணில் உறங்கிடும் வித்துக்கள்!..

கார்த்திகைப் பூ எனது க்விலிங் கைவேலையில்...
~~~~~~~
கார்த்திகைப் பூத்தூவிக்
காத்திருப்போம் மாவீரரே!
பார்த்திருங்கள்! போற்றும் நம்மீழம்
புலருமே விரைந்து!
 _()_

மண்ணில் உறங்கிடும் வித்துக்கள்!
  

மண்ணில் உறங்கிடும் வித்துக்கள் - ஈழ
மறவர் எனும்தமிழ் முத்துக்கள்!
கண்ணாய்ப் போற்றிடும் சொத்துக்கள் – வீரம் 
கமழும் நறுமணக் கொத்துக்கள்!

வெல்லும் இலட்சியம் பாருங்கள் - யாவரும்
விரைந்தே ஒன்றெனச் சேருங்கள்!
சொல்லும் மந்திரம் கூறுங்கள் - உலகில்
துணிவாய் உரிமையைக் கோருங்கள்!

நாளை நமதெனப் பாடுங்கள் - வாழ
நன்னாள் நெருங்கிடும் ஆடுங்கள்!
காலைக் கதிரினைச் சூடுங்கள் - நம்
கடமை உணர்ந்துநடை போடுங்கள்!
~~~~~~~~~~~~


வானில் ஒளிர்கின்ற சூரியனை, வாழ்வினில்
வீணென எண்ணுதல் வீம்பு!
~~~~~~~~~~~

மண் காக்கத் தமையீந்த மாவீரர் நினைவான பதிவென்பதால்
இம்முறை பதிவோடு பகிரும் பதிவரை இணைக்கவில்லை...
_()_

Nov 15, 2013

விரைந்திடுக!...

கூகிளில் கண்ட ஓவியம் என் க்விலிங் கைவேலையில்!.

இது என்னவென்று தெரிகிறதா?...

தொடர்புபடுத்தி இதற்கென எழுதிய குறள் தருகிறேன்
கண்டுபிடியுங்கள்!..:)

கூட்டினுள் பூட்டிவிட்டோ குள்ளநரி கும்மாளம்
காட்டிடுமே தன்பலங் கோர்த்து!
~~~O~~~

விரைந்திடுக!...


தேடி அலைந்தேன் தினந்தினமே
தேனே! மலரே! கண்டதுண்டோ?
வாடி நிதமும் வலிகொண்டே
வாழ்ந்த தேசம் எண்ணுகிறேன் !
கூடி இருந்த சுற்றமெங்கே?
கூறக் கேட்போர் யாருமில்லை!
பேடி அங்கே கொல்லுவதைப்
பேச்சு இழந்தே பார்ப்பதுவோ?

கூவிக் களிக்கும் கோகிலமே
கூச்சல் ஏதும் கேட்கிறதா?
தீவில் நடக்கும் கொடுமைகளைத்
தீர்க உரக்கக் கூவிடுங்கள்!
மேவி அவனை வென்றிட்டே
மேன்மை யோடு வாழ்ந்திடலாம்
தாவிக் குதிக்கும் கொடியவனைத்
தாக்கி நாட்டை மீட்டிடுவோம்!

ஆவி சோர்ந்து போகுமுன்னே
ஆற்றும் கடமை மிகவுண்டு!
தேவி அன்னை துணைஉண்டு
தேடிப் பகைவன் தலைகொய்வோம்!
பாவி அவனை அழித்தால்தான்
பழியும் நீங்கி நாம்வாழ்வோம்!
கூவி அழைத்தேன் உறவுகளே
கூடி ஒன்றாய் விரைந்திடுக!
~~~~~~~

உதிக்கின்ற எண்ணங்கள் உள்ளத்துள் ஓங்க
பதிக்கின்ற பாக்களைப் பார்!
~~~O~~~

பதிவோடு பகிரும் பதிவர்
~~~~~~~~

வலையுலகில் எனது அன்புக்குரிய சகோதரராகிய
  விமலன் அவர்களின் சிட்டுக்குருவி
என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்துகொள்வதில்
மிக்க மகிழ்வடைகிறேன்.


சகோதரர் விமலன் தனது வலைப்பூவில் சிறுகதை, கவிதை, சொற்சித்திரம், சமூகம்… என இன்னும் பல எழுத்தாக்கங்களைப் பதிந்துவரும் ஒரு ஆர்வமிக்க பதிவாளர்.
ஒரு நாளைக்கு ஒரு பதிவென்றில்லாமல் சிலசமயங்களில் இரண்டு மூன்று பதிவுகளைக்கூட தனது வலையிற் பதியும் ஒரு வேகமான பதிவர் விமலன் ஆவார்.

இவரின் சிறுகதைகளை வாசிக்கும் ஒவ்வொரு முறையும் எனக்கு ஒரு குறும்படம் பார்க்கும் உணர்வே தோன்றும். காட்சிகளை எழுத்தில் வடிக்கும் விதமே அலாதியானது. அதிலும் இயற்கைக் காட்சிகளை அத்தனை விருப்போடு மிக மிக அழகாக வர்ணித்து அதிலேயே ஒன்றித்து எழுதுவார்.

சகோதரர் தரும் கவிதைகளும் கருப்பொருள் சிறப்பாக இருக்கும்.

விமலன் அவர்கள் வலைச்சர ஆசிரியராகவும் கடந்த மாதங்களில் இருந்திருக்கின்றார்.

தன் பதிவுகளுக்கு தகுந்த அழகிய படங்களையும், அனிமேசன் காட்சிகளையும் சேர்த்துப் பதிவிடுவதில் ஆர்வமிக்கவர்.

எழுத்துத் துறையில் நல்ல ஆர்வமுடன் தனது பதிவுகளோடு சக பதிவர்கள் வலைத் தளங்களுக்கும் சென்று சிறந்த நல்ல கருத்துகளைப் பகிர்வு செய்து அவர்களை ஊக்குவிக்கும் இயல்பானவர்.

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களே விமலன் அவர்களின் வலைப்பூவிற்குச் சென்று பார்த்தால் மேலும் அறிந்துகொள்வீர்கள்!

விமலன் அவர்களின் வலைப்பூவினைத் தெரியாதோர் இருக்கமாட்டார்கள். ஆயினும் இதுவரை அறியாதோர் இருப்பின் அவரின் தளத்திற்கும் சென்று அவரையும்  ஊக்குவிக்கலாமென இங்கு  இத்தரவுகளை உங்களோடு பகிர்ந்துகொள்வதில் மகிழ்வடைகின்றேன்!..

மிக்க நன்றி அன்பு உறவுகளே!
_()_

Oct 31, 2013

உணர்வெனும் தீபம்!..


உள்ளத் தாமரையில்
உணர்வோடு ஏற்றும் தீபமாகக்
க்விலிங் கைவேலையில்...
~O~O~O~


உணர்வெனும் தீபம்!
~~~~~~~~

அரக்கனை மாய்த்தாய்! அகிலத்தைக் காத்தாய்!
சுரக்கும் அருளைச் சொரிந்தாய்! - உரக்கவே
கூவி அழைக்கின்றேன் கோகுலத்து நற்கண்ணா!  
தாவித் தகர்ப்பாய் தடை!

அடிமைத் தனத்தை அகற்ற! நலமாய்க்
குடிமை உயர்ந்து கொழிக்க! - விடிவினை
நாடி விளைக்க நறுங்கண்ணா செய்கவே!
கூடி மகிழ்வோம் குளிர்ந்து!

பொல்லார் உயர்ந்து புவியைச் சிதைப்பதோ?
நல்லார் நலிந்து கிடப்பதோ? - இல்லார்
நலங்காண  நல்குவாய் நாரணா! ஏழை
உளங்குளிரச் செய்வாய் உவந்து!

ஆற்றும் கடமை அறிந்தே அருந்தமிழைப்
போற்றி மகிழ்ந்து புகழ்பெறுவீர்! - ஊற்றெனப்
பொங்கும் உணர்வால் பொலிந்திடும் நல்வாழ்வு!
தங்கும் இனிமை தழைத்து!

தாக்கும் வறுமையைத் தள்ளி மிதித்திடுக!
பூக்கும் இனிமை! புகழ்த்தமிழைக் - காக்கும்
உணர்வெனும் தீபம் உளத்துள் ஒளிர்ந்திட்டால்
மணம்பெறும் வாழ்வு மலர்ந்து!
~O~O~O~

நின்று மனத்துள் நெகிழ்கிறதே இன்பத்தை
என்று தருமோ இயம்பு!
~~~~~~~~

பதிவோடு பகிரும் பதிவர்
~~~~~~~~

வலையுலகில் எனது அன்புக்குரிய தோழியான
 பிரியா அவர்களின் மழைச்சாரல்
என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்துகொள்வதில்
மிக்க மகிழ்வடைகிறேன்.

மழைச்சாரல்

http://wordsofpriya.blogspot.com/

பிரியா தனது வலத்தள சுய விபரப்பதிவில் `எழுத்தை அதிகம் நேசிப்பவள்... மௌனத்தில் உறைந்து போயிருக்கும் என் எண்ணங்களை வெளிப்படுத்த எழுத்தை காட்டிலும் சிறந்த விஷயம் வேறு எதுவும் இருப்பதாக தெரியவில்லை..... எல்லைகளற்ற எண்ண வெளியில் என்னுடைய எண்ணங்கள் முழுவதுமாய் வெளிப்படுவது என் எழுத்துகளின் வடிவில்தான்... என் எழுதுகோலும் புத்தகமும் எப்பொழுதும் நான் எழுதும் எழுத்துகளை எதிர்ப்பதில்லை, என்னை நையாண்டி செய்வதில்லை, என் எண்ணங்களுக்கு தடை இடுவதும் இல்லை. ஏதொன்றையும் எழுதி முடிக்கையில் மனதில் எழும் அமைதி வேறு எந்த செயலினாலும் விளைவதில்லை அதனாலேயே எழுத்து எனக்கு மிகவும் நெருக்கமாகி போனது...பழமைக்கும் புதுமைக்கும் இடையே சிக்குண்டு எப்பக்கமும் முழுமையாய் சாயாமல் எண்ணச் சிக்கல்களில் நான் எழுதிய வரிகள் இங்கே.... உங்கள் கண்முன்... உங்களது கருத்துகளையும் ஊக்குவிப்பையும் எதிர் நோக்கி....` என்று தன் எண்ணத்தைத் தன்னைப் பற்றி அழகாக வெளிப்படுத்தியுள்ளார்.

பிரியா மிக அருமையான கற்பனைகளும் அதன் வெளிப்பாடான எழுத்து வல்லமையும் நிறைந்தவர்.
கவிதை, கதை, கட்டுரைகள் எனப் பலதரப்பட்ட விடயங்கள் பிரியாவின் வலைத்தளத்தில் பரந்து விரிந்து படைக்கப்பட்டிருப்பதைக் காணலாம்.

தோழியின் படைப்புகள் ஏராளம் இருந்தும் அண்மையில் அவரின் கவிதைப் படைப்பான தேநீரின் கதை என் மனதை மிகவும் நெருடியது!

எழுத்துத் துறையில் நல்ல ஆர்வமுடன் தனது பதிவுகளோடு சக பதிவர்கள் வலைத் தளங்களுக்கும் சென்று சிறந்த நல்ல கருத்துகளைப் பகிர்வு செய்து அவர்களை ஊக்குவிக்கும் அன்பானவர்.

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களே பிரியாவின் வலைப்பூவிற்குச் சென்று பார்த்தால் மேலும் அறிந்துகொள்வீர்கள்!

இவரின் வலைப்பூவினைத் தெரியாதோர் இருக்கமாட்டார்கள். ஆயினும் இதுவரை அறியாதோர் இருப்பின் அவரின் தளத்திற்கும் சென்று அவரையும்  ஊக்குவிக்கலாமென இங்கு  இத்தரவுகளை உங்களோடு பகிர்ந்துகொள்வதில் மகிழ்வடைகின்றேன்!..

மிக்க நன்றி அன்பு உறவுகளே!
~0~0~0~


அனைவருக்கும் தித்திக்கும் இனிய
தீபாவளி நல் வாழ்த்துக்கள்!.

_()_

Oct 23, 2013

ஒளி காட்டும் வழி!..

 கோட்டுச் சித்திரத்தில் என் மனதைக் கவர்ந்த 
மழலை இங்கு
 எனது க்விலிங் கைவேலையில்!...:)
≈≈≈≈≈

ஒளி காட்டும் வழி!.
 


இருளில் இருந்தால் இடர்மிகுந் தோங்கும்!
அருளிலா வாழ்வு  துயர்மிகுந் தேங்கும்!
பொருளைத் தேடினால் புலருமோ வாழ்வு!
மருளை நீக்கிட மதியொளி ஏற்றுவீர்!

உணர்வதோ தருவதோ ஒன்றுமே இல்லாது
திணறுவரோ போராடித் தினமும் சிதைந்து!
மலர்கின்ற யாவும் மணம் கொண்டதில்லை!
புலர்கின்ற கதிராய்ப் புறப்பட்டுச் செல்வீர்!

எண்ணிட வேண்டும் இல்லாமை உளதென்று
நண்ணிட நல்குவீர் நல்லுதவி இன்றே!
கல்வி ஒளியே கண்ணெனக் கருதியே
சொல்லித் தருவீர் சுடர்ந்திட வாழ்வே!

அடக்குமுறை அதிகாரம் ஆணவம் எம்மை
மடக்கியே மந்தையாய் மகிழ்வதைக் கடக்க
திடங்கொண்டு எழுவீர்! தீயவரை அழிப்பீர்!
இடங்கண்டு சேருவீர்! இன்னல் தீரவே!

அன்பொளி ஏற்றுக! அருளொளி ஏற்றுக!
பண்பொளி ஏற்றுக! பண்ணொளி ஏற்றுக!
இன்பவொளி ஏற்றுக! இதயத்துள் மின்ன!
துன்பகன்று ஓடும்! துணிவொளி யாலே!

தங்கத் தமிழொளி! எங்கள் உயிரொளி!
பொங்கும் மறவரால் பொலியும் புகழொளி!
நம்மின் தலைவன் நல்கிய பேரொளி!
எம்மினம் நிமிர இயம்பிடும் நல்வழியே!.

  

இக் கவிதையினை அன்புச் சகோதரர் ரூபனின் தீபாவளிக் கவிதைப் போட்டிக்கு அனுப்புகிறேன்.

போட்டியில் பங்குகொள்ளும் அளவிற்கு எனக்கு ஆற்றல் இல்லை...
ஆயினும் ரூபனின் இந்த நல்ல முயற்சிக்கு ஆதரவு கொடுக்கும் நோக்கமுடன் இதனை அவருக்கு அனுப்பி வைக்கின்றேன்!.
≈≈≈≈≈


நல்லவர்  நட்பைத் தேடி
நலம்பல பெறுவோம் நன்றே!
வல்லவர் அன்பை வேண்டி
வளம்பல காண்போம் இன்றே!
~~~~~~~~~



உள்ளூறும் உன்னுணர்வு உறங்கிப் போமோ
உயிரூறும் என்னில் உறைந்து!..
 *********


பதிவோடு பகிரும் பதிவர்
~~~~~~~~


வலையுலகில் எனது அன்புக்குரிய சகோதரராகிய
 அ. பாண்டியன் அவர்களின் அரும்புகள் மலரட்டும்
என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்துகொள்வதில்
மிக்க மகிழ்வடைகிறேன்.
அரும்புகள் மலரட்டும்

http://pandianpandi.blogspot.com/

`வாழ்க்கைப் பயணத்தை ரசித்துக் கொண்டு நடக்கும் சாதாரண வழிபோக்கன் நான்` எனத் தன்னை அறிமுகப்படுத்தியிருக்கும் சகோதரர் பாண்டியன் தான் படித்த, அறிந்த, விடயங்களுடன் மொழி, கலை, கவிதை, இப்படிப் பலதரப்பட்ட விடயங்களையும் தனது வலைப்பூவில் பதிவாக்கி வருகிறார்.

சென்ற ஆகஸ்ட் மாதப் பதிவில் புதுக்கவிதையின் வடிவம்- ஓர் ஆய்வு  எனப் புதுக்கவிதை இயற்றலும் அதன் வடிவங்கள் பற்றியும் அருமையான விடயத்தைப் பதிவிட்டுள்ளார். புதுக்கவிதை எழுதுவதில் ஆர்வமுள்ளவர்கள் பயன் பெறக்கூடிய நல்ல பதிவு.

எழுத்துத் துறையில் நல்ல ஆர்வமுடன் தனது பதிவுகளோடு சக பதிவர்கள் வலைத் தளங்களுக்கும் சென்று சிறந்த நல்ல கருத்துகளைப் பகிர்வு செய்து அவர்களை ஊக்குவிக்கும் அன்பானவர் சகோதரர் பாண்டியன்!…

இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களே அவர் வலைப்பூவிற்குச் சென்று பார்த்தால் மேலும் அறிந்துகொள்வீர்கள்!

பாண்டியன் அவர்களின் வலைப்பூவினைத் தெரியாதோர் இருக்கமாட்டார்கள். ஆயினும் இதுவரை அறியாதோர் இருப்பின் அவரின் தளத்திற்கும் சென்று அவரையும்  ஊக்குவிக்கலாமென இங்கு  இத்தரவுகளை உங்களோடு பகிர்ந்துகொள்வதில் மகிழ்வடைகின்றேன்!..

மிக்க நன்றி அன்பு உறவுகளே!
_()_
********************************************************************************

க்விலிங் - Quilling - ஓர் அறிமுகம்!.

கடந்த பதிவுகளில் எனது க்விலிங் வடிவங்களைப் பார்த்து
சில அன்புள்ளங்கள் கேட்டுக்கொண்டமைக்கு இணங்க
இங்கு அதனைப் பற்றி எனக்குத் தெரிந்ததைத் தொகுத்துத் தருகிறேன்!

தவறுகள் இருந்தால் மன்னிக்க வேண்டுகிறேன்!
********************************

வர்ணத் தாள் நாடாக்களினால் செய்யப்படும் ஓர் அழகிய கைப்பணியாகும்!.

மேலே படத்தில் நான் உபயோகப்படுத்தும் வர்ணத்தாள் நாடாக்கள், பசை, கத்தரிக்கோல், இரண்டு வகையான இடுக்கிகள், மூன்று வகையான க்விலிங் கருவிகள் ஆகியனவற்றைப் படமாக்கித் தந்துள்ளேன்.

இதற்குத் தேவையான அடிப்படைப் பொருட்கள்:

*3 மில்லிமீட்டர் அளவு பருமனில் நேர்த்தியாக வெட்டப் பட்ட பல வர்ணத்தாள் நாடாக்கள்.
நீளம் நீங்கள் செய்யும் வடிவங்களுக்கு ஏற்றவகையில் மாறுபடும்.

*தாளை உருட்ட- roll செய்ய – அதற்குரிய கருவி.
மிக மெல்லிய முனை கூராக அல்லாத தட்டையாக நடுவே ஒரு வெட்டு இடப்பட்டிருக்கும் உலோகத்தினால் ஆனது.

இதில் தாளின் முனைப் பகுதியை செருகி மெதுவாகத் தாள் நாடாவினை ஒரு கை விரலால் பிடித்து மறு கையால் அக்கருவியை உருட்ட தாள் நாடா அதில் உருண்டுகொள்ளும். பின்னர் மெதுவாக கருவியிலிருந்து சுருளை உருவி எடுத்து அதை இறுக்கமான சுருளாக வடிவமைத்தோ அல்லது சற்றுத் தளரவிட்ட சுருளில் வடிவங்களை அமைக்கவோ பயன்படுத்தலாம்…

*ஒட்டுவதற்குப் பசை: அதிக நீர்ப்பதமாயில்லாமலும் களி நிலையில் இல்லாததுமான இறுக்கமான பசை.

*வெட்டுவதற்கு முனை மிகக் கூரான கத்திரிக்கோல்

*இடுக்கி – Tweezers - நேரானது, மூக்கு வளைவானது.
சுருட்டிய சுருளை கையாள்வதற்கு உதவுவது இது.

இவையே அடிப்படித் தேவையானவை.

தாள் நாடாவைச் சுருட்ட பற்குத்தும் குச்சியை கூரான பாகத்தை அகற்றி எடுத்து அதன் நடுவே கத்தியால் சிறிதாக ஒரு வெட்டு வெட்டி அதில் தாள் முனையை செருகி உருட்டலாம்.
நான் இதற்கு பழைய போல்ட்பொயின்ற் - Bold point pen - பேனையின் கோதில் இக்குச்சியை செருகி வைத்து அதனாலும் செய்ததுண்டு.

ஆரம்பத்தில் கை பழகுவதற்கு அதிக பணம் செலவு செய்யாமல் இவற்றினாலே கைவசம் இருக்கும் தாளினை சீராக வெட்டிச் சுருட்டி ஒட்டிப் பல வடிவங்களைப் பயிலலாம்.


இங்கு சில இணையத்தள இணைப்புகள் தந்துள்ளேன்..
இவற்றில் எப்படி க்விலிங் செய்வது என்று விளக்கமாக உள்ளது.

மேலும் கூகிளில் Quilling என்று தேடினாலே பலபேரின் செயல்முறைப் பயிற்சிகள் இருக்கின்றன. நீங்களும் பார்த்துச் செய்து மகிழுங்கள்!.
ஏதாயினும் உதவி தேவைப்படின் இங்கு கேளுங்கள். 
உதவக் காத்திருக்கின்றேன்!
நன்றி!.


http://increations.blogspot.de/2008/07/quilling-basics.html 

http://www.littlecircles.net/quilling-shapes-tutorial 

http://www.youtube.com/watch?v=r1nI3CsZbCA

http://www.youtube.com/watch?v=Divi6a8z000 

Oct 15, 2013

வேண்டுகிறேன்!..


கூகிலில் கிடைத்த படம் ஒன்றிற்கு
க்விலிங்க் கைவேலையில் முயன்றேன்...:)
~~~~~~~~~~~~

வேண்டுகிறேன்!..


பனித் துளியாய்ப் பூமியிலே பிறந்திடுவேனோ!..
பசுமையான புல் நுனியில் அமர்ந்திடுவேனோ!..
மனம் மகிழும் மாமலராய்ப் பிறந்திடுவேனோ!..
மாண்பு நிறை  மாதவனடி சேர்ந்திடுவேனோ!..

கருமைநிற முகிலென நான் பிறந்திடுவேனோ!..
களனியெலாம் பயிர் வளரப் பொழிந்திடுவேனோ!..
வயல்களிலே நெல் மணியாய்ப் பிறந்திடுவேனோ!..
வறுமைதனில் வாடும் வயிறு நிறைத்திடுவேனோ!..

வானமதில் வெண் நிலவாய்ப் பிறந்திடுவேனோ!..
வாழும் இருள் வீதியெங்கும் ஒளிதருவேனோ!..
செங்கதிரோன் சூரியனாயப் பிறந்திடுவேனோ!..
சூதுகொள்ளும் வஞ்சகரைச் சுட்டெரிப்பேனோ!..

சோலையிலே சின்னச் சிட்டாய்ப் பிறந்திடுவேனோ!..
சோகமில்லாச் சுகந்த ராகம் மீட்டிடுவேனோ!..
தாயகத்தில் மீண்டும் அங்கே பிறந்திடுவேனோ!..
தமிழன்னை காக்க உயிர் தந்திடுவேனோ!!..
~~~~~~~~~~~


அன்பில் தோன்றுதே அமைதி!
அறிவில் தெரியுதே திறமை!
நட்பில் பிறக்குதே உறுதி!
நலத்தில் மலருதே மகிழ்ச்சி!.
********


காற்றாய்க் கலந்திடக் கற்பனை உன்னோடு
ஊற்றாய்ச் சுரக்கும் உணர்வு!
*******


பதிவோடு பகிரும் பதிவர்
~~~~~~~~


 வலையுலகில் எனது அன்புக்குரிய சகோதரராகிய
 ரூபன் அவர்களின் ரூபனின் எழுத்துப் படைப்புக்கள்
என்னும் வலைப்பூவினை இம்முறை
பதிவோடு பகிரும் பதிவராக உங்களுடன் பகிர்ந்துகொள்வதில் 
மிக்க மகிழ்வடைகிறேன்.

  ரூபனின் எழுத்துப் படைப்புக்கள்

  http://2008rupan.wordpress.com/

சகோதரர் ரூபன் அவர்கள் ஈழமணித் திருநாட்டினைத் தாயகமாகவும் மலேசியாவை வசிப்பிடமாகவும் கொண்டவர். தமிழ்மொழிப் பற்று மிக்கவர்.

  இவர் தனது வலைப்பூவில் கவிதை, சிறுகதை போன்றவற்றை எழுதிப் பதிவிட்டுவருகிறார். 

தீபாவளித் திருநாளையொட்டி அண்மையில் தனது வலைத்தளத்தில் கவிதைப் போட்டி ஒன்றையும் ஆரம்பித்து வைத்துள்ளார்.

தனது வலைப்பூவினில் பதிவிடுவதுடன் சக பதிவர்களிடமும் சென்று கருத்துரையிட்டு அவர்களை ஊக்குவிப்பதில் முன்னணியில் நிற்கும் ஒருவர்!.
அன்புமிக்கவராய் அனைவர் மனதிலும் நிறைந்தவர் ரூபன்!…

 இவரின் வலைப்பூவினைப் பற்றி நான் அதிகம் உங்களுக்குச் சொல்வதைவிட நீங்களே அவர் வலைப்பூவிற்குச் சென்று பார்த்தால் மேலும் அறிந்துகொள்வீர்கள்!

ரூபனின் வலைப்பூவினைத் தெரியாதோர் இருக்கமாட்டார்கள். இருந்தும் இதுவரை அறியாதோர் இருப்பின் அவரின் தளத்திற்கும் சென்று அவரையும்  ஊக்குவிக்கலாமென இவற்றை இங்கு மகிழ்வுடன் உங்களோடு பகிர்ந்துகொள்கின்றேன்!...
மிக்க நன்றி அன்பு உறவுகளே!
__()__